Prachtig Roermond - Vastelaovesleedjes

Remunjse Vastelaovesleedjes

Vastelaovesleedjes gemaak door mien mooder
Gerda van Vlodrop-Schumacher.
Van ein paar leedjes haed häör broor Harry Schumacher
de wäörd gesjreve.

Munsterpleinwals 1948-1950

Remunj,sjtedje van al mien druime,
doe zits mich zo deep in mien hert.
Mit al dien historische plekskes,
de Wal en de Sjteeg en de Mert.
Maar ein plekske geit nooit nieks boave,
gein plekske det is t'r zo fijn.
Det ligk zo in 't midde van 't sjtedje,
mien aad Munsterplein.

Refrein:
En al op det Munsterplein,
dao sjteit ein nuuj fontein.
Ein pómp mer det is bluf,
die gaar gein water guf.
En Cuupers monument,
en ouch ein friete tent.
Zo sjteit dao van alles biej ein,
dao op det Munsterplein.

En dan oze blaozers en zengers,
die gaeve dao zomers kónzaer.
En al waat mer aeve kan loupe,
det trek dan gezellig dao haer.
En es dich de ore dan toete,
dan geit me tevreje nao hoes.
En pak dan toet sjlot van de aovend,
ein täötje mit friet op de voes.
Refrein:

Kóm,knip mich ins ein uigske 1951

Ich waar les örges in Remunj,
op eine bal aan 't danse.
Ich had ein maedje in mien erm,
det wis nog nieks van sjanse.
Al deej ich nog zo good mies bes,
't bleef ein gans verlaege nes.
Toen zóng ich in zien oor,
zo ónger 't danse door.

Refrein:
Kóm,knip mich ins ein uigske,
en gaef mich ins ein kans.
En bön neet zo verlaege,
es ich ins mit dich dans.
Kóm,knip mich ins ein uigske,
doe bös toch van Remunj.
Zo sjanse biej 't danse,
det is nog lang gein zuunj.

Het keek mich heel verlaege aan,
begós toen gans de kleure.
Ich dach:Maar leve siestemich,
waat geit d'r noe gebeure.
Het sjloog toen weer de ouge neer,
en zag zing det nog eine keer.
Ich zóng toen sjtapel sjmoor,
get doonder biej zien oor.
Refrein:

Remunj sjteit op de kop 1952

Eederen ellefde November,
kump d'n Uul weer op de troon.
Laot ós det noe allemaol weer viere,
op ozen aaje doon.
En is den tied dan aangebraoke,
van joeks en van plezeer.
Dan kinne veer gein zorge,
't is Vastelaovend weer.

Refrein:
Remunj sjteit op de kop,
auch al duujt Piet Lieftinck drop.
Veer lache en veer zinge,
veer danse en veer sjpringe.
De raod dae sjteit ós biej,
mit Prins en Hermenie.
En 't klink van wied en zied,
't is weer Vastelaovestied.

Heel de sjtad is oetgelaote,
nemes kint Remunj nog trök.
In café's en ouch op alle sjtraote,
't is euveral aeve drök.
En nao det Vastelaoves viere,
höbbe veer weer frisse mood.
En ederein zaet lachend,
't waas dit jaor weer good.
Refrein:

Pietje,Pietje noe maak 't ein bietje 1953

Refrein:
Kóm Pietje Pietje,
noe maak 'r ein bietje.
Kóm sjpooj dich get,
ich ligk mit ies kaaj veut in bed.
Maak neet alles,
alles in de war.
Ich ligk te riejere,
met doe zits in de bar.

Helaas, is de volledige teks kwiet.
't zól geweldig zeen es emes dae
had en mich op kós sjture.

Wo kómme ze vanaaf 1955

De werreld is vol raodsele,
det merk ich eed'ren daag.
En heel väöl raodsles ligke ós,
soms heel zjwaor op de maag.
Kwaoj vrouwluuj loupe d'r hiej róndj,
maar toch det sjnap ich neet.
Ze zeen toch neet gesjaope,
en me vinjt ze biej de vleet.

Refrein:
Want alle maedjes zeen zo leef,
die vrouwluuj is ein plaog.
Wo kómme die noe toch vanaaf,
det is veur mich ein vraog.
Want alle maedjes zeen zo leef,
die vrouwluuj is ein plaog.
Wo kómme die noe toch vanaaf,
Det is veur mich ein vraog.

Ich prakkezeer mien herses plat,
wie kan zo get besjtaon.
Die vrouwluuj hiej op aerd gezat,
waem haet det toch gedaon.
D'róm is ter maar ein meug"likheid,
gein anger die ich zeen.
Ich gluif vas det ze sjtiekem,
oet de hel gekraope zeen.
Refrein:

Trök

Moezewals 1956

Veldj, ós Veldj,
ich haaj zo van dich.
Doe bös alles,
alles veur mich.
In oos hert,
bliefs doe nómmer ein.
Dao óm ouch zinge,
veer dit refrein.

Refrein:
Veldj haet gein Hamsjtraot,
en ouch gein Munsterplein.
Maar zo wie 't Veldj is,
zo vinjt ze d'r neet ein.
Veer zeen neet greuts,
veer haaje neet van sjtandj.
Gaon door 't laeve,
altied handj in handj.

Oet gaon door veer,
gaer in 't Veldj.
Nemes haet hiej,
las van zien geldj.
Dao óm raoj ich,
ederein aan.
Veer gaon noe d'raan.
Refrein: